दे कोकिळे आम्हा नवचैतन्य
ऐकिली साद तुझी गोड कुहुक
अवतरलीस सखे वसंत सन्मुख
नितवर्षी आपण गळ्यात घालूनी गळे
भेटलो बागेत तू नि मी मंजुळे
परि साद मी ऐकूनी तुझी कानी
ना धावत आले आज अंगणी
दशदिशा कापती भये मृत्युचे थैमान
जगती वेगे आज महामारीचा फैलाव
देवदूत तू आळव हो प्रभूसी
मिळो वरदान निरामय जीवन आम्हासी
आप्तेष्ट-स्वजनांसंगे ऐकू हो गीत तुझे
लाभो आम्हा भाग्य नाते चैत्रपालवीचे
नववर्ष आगमने होऊनी प्रफुल्लीत
उभारू गुढी घरी-दारी सजवू आरास फुले रंगीत
दे कोकिळे दे आम्हा नवचैतन्य
दशदिशा उजळो तेजे जन्म सफल धन्य
- सौ. मेधा श्रीश कामत
No comments:
Post a Comment